GERNLERUS Lucas

GERNLERUS Lucas

Theologus Basiliensis, eruditione, pietate facundiâ, Orthodoxiae zelo, agendi dexteritate, celeberrimus. Natus A. C. 1625. patre Ioh. per 50. Ann. Ecclesiaste inculpato: post egregiam Lingg. Philosophiaeque peritiam haustam, Theologiae animum applicuit: cui in patrio Athenaeo, auspiciis Zuingerii, Buxtorfii, Beckii, Grynaei, virorum celeberrimorum, feliciter operatus, ad exteras Ecclesias visendas, per Galliam, Britanniam, belgium, et Germaniam iter instituit: Redux in patriam, postquam foris domique verbum Domini, incredibili successu aliquandiu praedicavit; dignus est habitus, qui Theodoro Zuingero, Socero suo, Ecclesiae Basil. Antistiti Sexto, A. C. 1654. in Domino pie defuncto, succederet; a quo tempore, quantus in Ecclesia, quantus in Academia esset, indefatigabili alacritate, testatus est luculentissime. Obiit A. C. 1675. mens. Febr. postquam aliquot mens. ante sub finem anni praec. suggestus, e quo populum solito zelo docebat, ingenti terrae motu intremuit, et Luna mox Cal. Ian. emortualis anni totum vultum horribili ferrugine texit. Eius brevi prodibunt: Praelectiones in Prophetiam Danielis, aliaque luce quam maxime digna. Pater fuit Ioh. Henrici iam Ecclesiastae in patria Micropolitani, et Theodori, Coetus Germanici qui Genevae colligitur Ministri, qui ambo vestigiis paternis avitisque strenue insistunt. Vide Petrum Werensel sium, qui illi in functione successit, in Orat. fun.

Nox postquam oppressit tantum, mea Patria, sidus,

Qui micat, ô mirum! rursus ab axe dies?